សង្ខេបលទ្ធផលការឃ្លាំមើលសវនាការ  

1. សមាគមអាដហុក បានចូលរួមឃ្លាំមើលសវនាការសរុប ១៧៥ករណី ស្ថិតនៅ២០រាជធានី-ខេត្ត ដែលមានករណីសិទ្ធិមនុស្ស៤៥.១% ករណីសិទ្ធិដីធ្លី១៨.៣% និងករណីស្រ្តី-កុមារ៣៦.៦%។ ហើយក្នុងនោះមាន បទឧក្រិដ្ឋ ១៣៧ករណី និង បទមជ្ឈឹម៣៨ករណី  ដែលមានជនរងគ្រោះជាជនជាប់ចោទ  សរុបចំនួន ​១,១៦៥នាក់ និងដើមបណ្តឹងជាជនរងគ្រោះចំនួន៤៥២នាក់។

2. ១៤២ នៃ១៧៥ករណី  ជនជាប់ចោទត្រូវតុលាការ សំរេចឃុំខ្លួនបណ្តោះអាសន្ន  ហើយបើគិតដល់ ថ្ងៃបើកសវនាការជំនុំជម្រះមាន ជនជាប់ ចោទ៨០ករណី ត្រូវបានតុលាការឃុំខ្លួនបណ្តោះអាសន្នលើសពី៦ខែរហូតដល់២៤ខែ ។

3. តុលាការនៅតែមានភាពយឺតយ៉ាវបើកសវនាការ ​ រហូតដល់ចន្លោះពី មួយម៉ោងជាង  ទៅពីរម៉ោង  បើប្រៀបធៀបជាមួយម៉ោងក្នុងដីកាកោះហៅ និង​ម៉ោងពេល​បើកសវនាការជំនុំជម្រះពិតប្រាកដ ។

4. តុលាការនៅតែមានភាពយឺតយ៉ាវ ក្នុងការចេញលិខិតអញ្ជើញមេធាវីតំណាងគូភាគី ដើម្បីចូលរួម​ក្នុងនីតិវិធីទាំងនៅតំណាក់កាលព្រះរាជអាជ្ញា តំណាក់​កាលស៊ើបសួរ និងតំណាក់កាលជំនុំជម្រះ ​ គឺលិខិតអញ្ជើញមកដល់ត្រឹមតែមួយថ្ងៃ ឬពីរថ្ងៃមុនពេលចាប់ផ្តើមនីតិវិធីប៉ុណ្ណោះ ។

5. ភាគច្រើនជាពិសេសករណីវិវាទដីធ្លី រវាងសហគមន៍ជាមួយនឹងអ្នកមានទ្រព្យ-មានអំណាច  ចៅក្រមជំនុំជម្រះ មិន បានអនុញ្ញាត (មិនបានកោះហៅ) ឲ្យសាក្សីដោះបន្ទុកចូលរួមធ្វើសក្ខីកម្ម ទោះបីជាមេធាវីបានដាក់ស្នើក៏ដោយ(ឧទាហរណ៍ដូចជា ករណីវិវាទដីធ្លីនៅខេត្តកោះកុង និងខេត្តព្រះសីហនុ ជាដើម) ។   

6. មានរហូតដល់ជាង៩០% តុលាការមិនបានជូនដំណឹងអំពីដីកាសម្រេច ដូចជា ដីកាសន្និដ្ឋានស្ថាពរ និងដីកាដំណោះស្រាយ។

7. តុលាការពេលខ្លះកោះហៅកូនក្តី មិនអញ្ជើញមេធាវី   ប៉ុន្តែបើបានអញ្ជើញមេធាវី  មិនកោះហៅកូនក្តី ​ចូលរួមនៅតំណាក់កាលព្រះរាជអាជ្ញា តំណាក់កាលចៅក្រមស៊ើបសួរ…។

អនុសាសន៍

1. ក្រសួងយុត្តិធម៌ ពិនិត្យដាក់វិធានការណ៍ច្បាស់លាស់ ចំពោះការអនុវត្តន៍របស់ចៅក្រម និងតំណាងអយ្យការ ទាំងឡាយណា ដែលផ្ទុយនឹងគោលបំណង មាត្រា២០៨ និងមាត្រា២០៩ នៃនីក្រមតិវិធីព្រហ្មទណ្ឌឆ្នាំ២០០៧  បានចែងអំពីថេរវេលា នៃការឃុំខ្លួនបណ្តោះអាសន្ន ។ បើយោងរបាយការណ៍បានបង្ហាញថា  ការឃុំខ្លួនបណ្តោះអាសន្ន ដែលមានថិរវេលាលើសពី៦ខែ ​រហូតដល់ជាង២៤ខែមានចំនួន៨០ករណី នៃករណីសរុប១៧៥ ។
2. ក្រសួងយុត្តិធម៌ពិនិត្យ និងដាក់ពិន័យរដ្ឋបាលធ្ងន់ធ្ងរដល់ចៅក្រម  និងតំណាងអយ្យការដែលមានការយឺតយ៉ាវចំពោះពេលវេលាបំពេញភារកិច្ចការងារ បើកសវនាការជំនុំជម្រះ ។  យោងតាមរបាយការណ៍បានបង្ហាញថា  មានភាពយឺតយ៉ាវខ្លាំងពីជាងមួយម៉ោង រហូតដល់ពីរម៉ោង  បើប្រៀបធៀបម៉ោងពេលបានកំណត់ក្នុងដីកា និងម៉ោងពេលបើកសវនាការជាក់ស្តែង។
3. ក្រសួងយុត្តិធម៌ ពិនិត្យដាក់វិធានការណ៍ច្បាស់លាស់  ចំពោះការអនុវត្តន៍របស់ចៅក្រម និងតំណាងអយ្យការទាំងឡាយណា ដែលមានការយឺតយ៉ាវក្នុងការចេញលិខិតអញ្ជើញមេធាវី និងភាគីចូលរួមក្នុងសវនាការជំនុំជម្រះ ។
4. ក្រសួងយុត្តិធម៌ ពិនិត្យដាក់វិធានការណ៍ច្បាស់លាស់  ចំពោះការអនុវត្តន៍របស់ចៅក្រម និងតំណាងអយ្យការទាំងឡាយណាដែលខកខាន មិនបានអញ្ជើញមេធាវីចូលរួមអមកូនក្តី ដើម្បីស្តាប់ចម្លើយកូនក្តីនៅតំណាក់កាលព្រះអាជ្ញា និងចៅក្រម ស្របតាមនីតិវិធី ។
5. ក្រសួងយុត្តិធម៌ ពិនិត្យដាក់វិធានការណ៍ច្បាស់លាស់  ចំពោះការអនុវត្តន៍របស់ចៅក្រម និងតំណាងអយ្យការទាំងឡាយណាដែលខកខានមិនបានជូនដំណឹងអំពីដីកាសម្រេចដូចជាដីកាសន្និដ្ឋានស្ថាពរ ​និងដីកាដំណោះស្រាយ ។
6. ចៅក្រម-តំណាងអយ្យការ ពិចារណាក្នុងការប្រើពាក្យ ឬនិយាយពីភាពមានឬគ្មានទោសដល់ជនជាប់ចោទ មុនពេលចេញសាលក្រម ជាពិសេសដូចជា ប្រាប់ឲ្យជនជាប់ចោទសុំទោស ។
7. ចៅក្រមពិនិត្យ-ពិចារណា អំពីសិទ្ធិរបស់ជនជាប់ចោទដូចជា  ជនជាប់ចោទមានពាក់ឯកសណ្ឋានពន្ធនាគារ និងដៃជាប់ខ្នោះ ក្នុងអំឡុងពេលសវនាការជំនុំជម្រះ ។
8. ចៅក្រមពន្យល់ប្រាប់ជនជាប់ចោទ-ជនរងគ្រោះ ឲ្យបានច្បាស់លាស់ អំពីសិទ្ធិដែលត្រូវទទួលបានដូចជា សិទ្ធិមានមេធាវី សិទ្ធិមិនឆ្លើយ  សិទ្ធិមិនបង្ខំឲ្យសារភាពកំហុស និងសិទ្ធិសន្មត់ទុកជាមុនថា គ្មានកំហុស សិទ្ធិដឹងពីបទចោទ សិទ្ធិដឹងការបរិច្ឆេទ-ទីកន្លែងប្រព្រឹត្តបទល្មើសជាដើម ។
9. ក្រសួងយុត្តិធម៌ ពិនិត្យដាក់វិធានការណ៍ច្បាស់លាស់ ចំពោះគ្រប់សាលាដំបូង ក្នុងការបើកចំហរដល់សាធារណៈជន និងអ្នកសារព័ត៌មានបានចូលស្តាប់សវនាការសាធារណៈ ដោយគ្មានការហាមឃាត់ និងបណ្តេញចេញ ។

ព័ត៌មានបន្ថែមសូមទំនាក់ទំនង ៖

លោក ស៊ឹង សែនករុណា អ្នកនាំពាក្យសមាគមអាដហុក ០៨៦ ៣២៤ ៦៦៦ / ០៨៩ ៦៦៦ ៣១២

Download report:

របាយការណ៍ឃ្លាំមើលតុលាការ២០២៣

សង្ខេបរបាយការណ៍ឃ្លាំមើលសវនាការ ២០២៣

Court Monitoring Report 2023

Summary of Trail Monitoring Report 2023