កាលពីនៅថ្ងៃទី០៨ ខែមីនា ឆ្នាំ២០២៦ នេះ សហគមន៍កែលម្អជីវភាពបរិបូណ៌ បានរៀបចំទិវានារីអន្តរជាតិ ខួបលើកទី១១៥ ឆ្នាំ២០២៦ ក្រោមប្រធានបទ «គាំពារសង្គមឆ្លើយតបវិបត្តិសម្រាប់ស្រ្តីវិស័យកសិ-ស្បៀងអាហារ» ដែលធ្វើឡើងនៅក្នុងភូមិបរិបូណ៌ ឃុំភ្នំត្បែងពីរ ស្រុកគូលែន ខេត្តព្រះវិហារ ដែលមានអ្នកចូលរួមពីអង្គការសង្គមស៊ីវិល សហគមន៍ ប្រជាពលរដ្ឋមកពីភូមិបរិបូណ៌ ភូមិស្រឡៃ ភូមិឈូក ឃុំភ្នំត្បែងពីរ សិស្សានុសិស្សនៃអនុវិទ្យាល័យបរិបូណ៌ អាជ្ញាធរឃុំ-ប៉ុស្តិ៍ និងមេភូមិទាំងបីភូមិ សរុបចំនួន១៥៧នាក់ ក្នុងនោះមានស្ត្រីចំនួន១០២នាក់។ ទិវានេះធ្វើឡើងក្នុងគោលបំណងលើកកម្ពស់ការទទួលស្គាល់សិទ្ធិ និងសេចក្តីថ្លៃថ្នូររបស់ស្រ្តីជនបទ ជំរុញប្រព័ន្ធគាំពារសង្គមដែលមានបរិយាបន្ន និងឆ្លើយតបនឹងវិបត្តិ ពង្រឹងសំឡេង និងសិទ្ធិអំណាចស្រ្តីក្នុងការចូលរួមធ្វើសេចក្តីសម្រេចចិត្ត និងលើកកម្ពស់ការយល់ដឹងរបស់ប្រជាពលរដ្ឋពីសិទ្ធិស្រ្តី និងសារៈសំខាន់នៃការចូលរួមរបស់ស្រ្តី ហើយគាំពារដល់ស្រ្តីដើម្បីចូលរួមក្នុងកិច្ចការអភិវឌ្ឍន៍សហគមន៍។
កម្មវិធីប្រព្រឹត្តទៅប្រកបដោយការចូលរួមជាមតិយោបល់ និងក្នុងបរិយាកាសបើកទូលាយ ដែលផ្តល់ឱកាសឱ្យស្រ្តី និងភាគីពាក់ព័ន្ធបានស្វែងយល់ពីបញ្ហា និងតម្រូវការរបស់ស្រ្តីនៅមូលដ្ឋានបន្ថែមលើប្រធានបទដែលមានស្រាប់។
