នៅថ្ងៃទី០១ ខែកញ្ញា ឆ្នាំ២០១៥ សមាគម អាដហុក បានជួយ អន្តរាគមន៍ ជនរងគ្រោះ ចំនួន ៤នាក់ ដែលចាញ់បោក មេខ្យល់ ទៅធ្វើការនៅ ប្រទេស ម៉ាឡេស៊ី ដោយចេញ ដំណើរតាម ច្រកព្រំដែន ប៉ោយប៉ែតឆ្ពោះ ទៅប្រទេស ម៉ាឡេស៊ី ដោយ ធ្វើការ ជាកម្មករ នៅក្នុង កសិដ្ឋាន ដាំដូង ប្រេង មានតួនាទី ជាអ្នក បាញ់ថ្នាំ សម្លាប់សត្វ នៅក្នុង តំបន់ឡាំកាត់ ។ តាំងពីទៅ ធ្វើការ ជាកម្មករ មិនស្រប ច្បាប់នៅ ក្នុងប្រទេស ម៉ាឡេស៊ី នៅពេលចុង ខែត្រូវ មេខ្យល់ ទៅបើក ប្រាក់ខែ យកអស់ ដោយ ទុកតែ ២៥ទៅ ៣០ដុល្លារ 
ប៉ុណ្ណោះ សំរាប់ទិញបាយ ។ ដោយសារ ធ្វើការ ច្រើនម៉ោង ហួសកម្លាំង មិនមានអាហាររូបបត្ថម្ភ គ្រប់គ្រាន់ និងពុលថ្នាំផង ជាហេតុធ្វើ ឲ្យជនរង គ្រោះមានជំងឺ ត្រូវចូល សំរាក នៅមន្ទីរពេទ្យ និងគ្មាន ថវិកា ព្យាបាល ។ ក្រោយពេលអន្តរាគមន៍របស់សមាគមអាដហុកទៅក្រសួងការបរទេស និងកិច្ចសហប្រតិបត្តិការអន្តរជាតិ និងក្រោមការជួយជ្រោមជ្រែងពីអង្គការ តេកាហ្វានីតា ប្រចាំប្រទេសម៉ាឡេស៊ីផង ជនរងគ្រោះទាំងបួននាក់បានវិលត្រឡប់មកប្រទេសកម្ពុជាវិញ តាមជើងយន្តហោះ Air-Asia កាលពីម្សិលមិញ ។
ជនរងគ្រោះទាំងបួននាក់នេះ មានឈ្មោះ ម.គគ, ហ.ធរ, ឆ.ឆរឆ, និង ន.មន ភេទប្រុស អ្នកទាំងអស់គ្នា រស់នៅភូមិលាវ ឃុំក្រវ៉ា ស្រុកបារាយ ខេត្តកំពង់ធំ បានចាញ់បោកមេខ្យល់ ឈ្មោះ រ័ត្ន ភេទប្រុសអាយុ៣៨ឆ្នាំ ជាខ្មែរឥស្លាម រស់នៅភូមិពព្រេង ឃុំស្ពឺ ស្រុកចំការលើ ខេត្តកំពង់ចាម ។
