អាជ្ញាធរខេត្តបន្ទាយមានជ័យ
សមត្ថកិច្ចធ្វើការរារាំងបាតុកម្មអហិង្សារបស់ក្រុមអាជីវករសេដ្ឋកិច្ចក្រៅប្រព័ន្ធ
ព្រឹកថ្ងៃទី០១ ខែមិថុនា ឆ្នាំ២០២០ កម្លាំងប្រដាប់អាវុធរួមមាន ប៉ូលីស កងរាជអាវុធហត្ថ ប្រជាការពារ និង កងកម្លាំងវរៈការពារព្រំដែន ខេត្តបន្ទាយមានជ័យ ប្រមាណជា ៣០០នាក់ ប្រដាប់ដោយអាវុធវែង ខ្លី ខែល ដំបងឆក់ និងឡានបាញ់ទឹក ដឹកនាំដោយលោក សិទ្ធិ ឡោះ ស្នងការរងខេត្ត លោក ង៉ោ ម៉េនជ្រួន និង លោក គឹង វណ្ណៈ អភិបាលរងបន្ទាយមានជ័យ បានដាក់ពង្រាយតាមផ្លូវជាតិលេខ៥ ចាប់ពីចំណុចវត្តផ្សារកណ្តាលរហូត ដល់រង្វង់មូលច្រកទ្វារព្រំដែន និងនៅតាមផ្លូវបត់ផ្សេងៗ ក្នុងក្រុងប៉ោយប៉ែត ដើម្បីទប់ស្កាត់ និងរារាំងក្រុមបាតុករមិនឲ្យធ្វើបាតុកម្មដោយអហិង្សា ។
បាតុកម្មនេះគ្រោងរៀបចំឡើងដោយ សមាគមពង្រឹងសេដ្ឋកិច្ចក្រៅប្រព័ន្ធកម្ពុជា”CERA” ចាប់ពីថ្ងៃទី០១ ដល់ថ្ងៃទី០៧ ខែមិថុនា ឆ្នាំ២០២០ ដោយមានការចូលរួមពីក្រុមអាជីវករសេដ្ឋកិច្ចក្រៅប្រព័ន្ធរួមមាន អ្នកលក់ដូរ អ្នករត់តាក់ស៊ី អ្នកម៉ូតូឌុប អ្នកអូសរទេះ និង ពលរដ្ឋផ្សេងៗទៀត ប្រមាណជាង ១០០០នាក់ ។ ក្នុងគោលបំណងទាមទារឲ្យអាជ្ញាធរកម្ពុជាចរចារជាមួយអាជ្ញាធរថៃ បើកច្រកព្រំដែន ដើម្បីប្រជាពលរដ្ឋបានចេញចូលទៅរកស៊ីលក់ដូរនៅផ្សារលុងគឿ”ប្រទេសថៃ” វិញ បើពុំនោះទេ ពួកគាត់ក៏ស្នើសុំឲ្យបិទកុំឲ្យរថយន្តដឹកទំនិញថៃចូលមកទឹកដីកម្ពុជាវិញដែរ ។ តែក្រោយមកគម្រោងនេះ ត្រូវបាន លោក ឌិន ពុទ្ធី ប្រធានសមាគមពង្រឹងសេដ្ឋកិច្ចក្រៅប្រព័ន្ធ រួមទាំងលោក ហ៊ិន សេងអឿន និងលោក ស៊ឹម វណ្ណៈ ជាតំណាងពលរដ្ឋ ប្រកាសមិនចូលរួមវិញ ដោយលោកទុកសិទ្ធិបន្តធ្វើ ឬមិនបន្តធ្វើ ឲ្យប្រជាពលរដ្ឋជាអ្នកសម្រេច ។ នៅថ្ងៃបន្ទាប់ពីខាងរដ្ឋបាលសាលាខេត្តបន្ទាយមានជ័យ បានចេញសេចក្តីសម្រេចមិនអនុញ្ញាតឲ្យថ្នាក់ដឹកនាំសមាគម ចូលរួមសម្របសម្រួលក្នុងការធ្វើបាតុកម្មនេះឡើយ ។
បន្ទាប់ពីឃើញកងកំលាំងដាក់ពង្រាយយ៉ាងច្រើនសន្ធឹកសន្ធាប់ និងគ្រប់ច្រកល្ហកយ៉ាងដូច្នេះ ក្រុមបាតុករមិនបានធ្វើការប្រមូលផ្តុំ ឬជួបជុំគ្នានោះទេ ក្រៅតែពីធ្វើដំណើរក្នុងភាពជាប្រក្រតីធម្មតា ព្រោះពួកគាត់មានការព្រួយបារម្ភ និងរកទីកន្លែងជួបជុំគ្នាមិនបាន ។ ម៉្យាងទៀត លោក ឌិន ពុទ្ធី បានបញ្ជាក់ក្នុងលិខិតថា ”សមាគមរបស់លោកមិនចូលរួមធ្វើបាតុកម្មនេះទេ ដោយសារតែលោកអភិបាលខេត្តបានចេញលិខិតហាមឃាត់មិនអនុញាតឲ្យធ្វើបាតុកម្មនេះ ។ ចំណែកប្រជាពលរដ្ឋធ្វើបាតុកម្ម ជាសិទ្ធិរបស់គាត់ តែថ្ងៃនេះសមត្ថកិច្ចបានពង្រាយកម្លាំងគ្រប់ផ្លូវទាំងអស់ ជាហេតុធ្វើឲ្យប្រជាពលរដ្ឋមិនអាចរកទីតាំង ដើម្បីប្រមូលផ្តុំគ្នាបាន ប៉ុន្តែ ពួកគាត់នៅតែរក្សាគោលជំហរ ថា នឹងធ្វើបាតុកម្មថ្ងៃណាមួយមិនខាន រហូតដល់មានដំណោះស្រាយរវាងភាគី ថៃ និងកម្ពុជា បើកច្រកដូចដើមវិញ” ។ ចំណែកលោក គឹង វណ្ណៈ អភិបាលរងខេត្តបន្ទាយមានជ័យ បាននិយាយថា ”លោកមិនបានឃាត់ឃាំងមិនឲ្យប្រជាពលរដ្ឋធ្វើបាតុកម្មទេ តែប្រទេសថៃ រាជរដ្ឋាភិបាលគេ បានដាក់ប្រទេសគេក្នុងគ្រាអាសន្ន ហើយគេមិនអាចបើកច្រកព្រំដែនបានឡើយ ។ ចំពោះទំនិញថៃដឹកចូលខ្មែរនេះ បើសិនខ្មែរមានទំនិញ ក៏អាចដឹកចូលទៅគេដូចគ្នា តែការដឹកចូលជាលក្ខណៈទ្រង់ទ្រាយធំ ”ដឹកតាមរថយន្តដឹកទំនិញធំៗ” ងាយស្រួលនិយាយជាមួយគេ” ។
នៅក្នុងព្រឹត្តការណ៍នោះដែរ លោក ហ៊ុន វណ្ណៈ ជាក្រុមយុវជនខ្មែរថាវរៈ ត្រូវបានសមត្ថកិច្ចប៉ូលីសចាប់ ខ្លួនគ្រាកស្លាបសេកដាក់លើម៉ូតូយកទៅកន្លែងស្ថានីយ៍រថភ្លើង ”កន្លែងឈរជើងរបស់សមត្ថកិច្ច” ខណៈយុវជនរូបនេះកំពុងឈរថតផ្តិតយករូបភាពសកម្មភាពសមត្ថកិច្ច នៅចំណុចរង្វង់មូលក្រុងប៉ោយប៉ែត ជាមួយអ្នកសារព័ត៌មានជាច្រើននាក់ផ្សេងទៀត ដើម្បីយកទៅសួរនាំ ដោយលោក តេង សម័យ ព្រះរាជអាជ្ញារងអមសាលាដំបូងខេត្តបន្ទាយមានជ័យ ធ្វើការសាកសួរអំពីគោលបំណង ដែលយុវជនរូបនេះ ថតរូបនាព្រឹត្តិការណ៍នេះ ។ ការសាកសួរនេះផ្តោតលើការចោទប្រកាន់ថា យុវជនរូបនេះ ជាភ្នាក់ងារសារព័ត៌មានព្រះអាទិត្យ ប៉ុន្តែត្រូវបានយុវជនរូបនេះ បដិសេធថា ”លោកមិនមែនជាអ្នកសារព័ត៌មានអ្វីទេ ហើយក៏មិនបានថតរូបឲ្យទៅឲ្យអ្នកណាដែរ គឺលោកជាប្រជាពលរដ្ឋ មានសិទ្ធិថតបាននៅក្នុងទីសាធារណៈ មិនចាំបាច់មានការអនុញ្ញាតនោះទេ” ។ ខណៈនោះខាងប៉ូលីសបានធ្វើកំណត់ហេតុ រួចហើយអោយផ្តិតមេដៃ ប៉ុន្តែលោកមិនបានផ្តិតមេដៃនោះទេ ។ នៅវេលាម៉ោង ១១ និង ៣៩ នាទី លោក ឌិន ពុទ្ធី បានចូលទៅជួបសមត្ថកិច្ច ដែលកំពុងសាកសួរធ្វើកំណត់ហេតុជាមួយ លោក ហ៊ុន វណ្ណៈ ដើម្បីធានា តែលោក ហ៊ុន វណ្ណៈ បានបដិសេធមិនឲ្យធានា ព្រោះបើសិនមានការធានានោះមានន័យថា គាត់ជាអ្នកប្រព្រឹត្តខុស ។ បន្ទាប់ពីសាកសួរអស់រយៈពេលជាច្រើនម៉ោងរួចមក លោក ហ៊ុន វណ្ណៈ ត្រូវបានសមត្ថកិច្ច អនុញាតឲ្យលោកមានសេរីភាពវិញ នៅវេលាម៉ោង ១២ និង ៣០នាទី ។
សូមបញ្ញាក់ថា លោក ហ៊ុន វណ្ណៈ ជាសកម្មជនសិទ្ធិមនុស្ស សព្វថ្ងៃគាត់ជាក្រុមយុវជនខ្មែរថាវរៈ ដែលផ្តោតទៅលើការងារស្រឡាញ់សង្គម បរិស្ថាន ឃ្លាំមើលសិទ្ធិមនុស្ស និង កិច្ចការព្រំដែន ។ លោកបានចាកចេញ ពីភ្នំពេញមកប៉ោយប៉ែតនេះ មានគ្នា ៣នាក់ ដើម្បីមកឃ្លាំមើលប្រជាពលរដ្ឋធ្វើបាតុកម្ម ។ បើគិតទាំងលើកនេះទៀតលោក ហ៊ុន វណ្ណៈ ត្រូវបានសមត្ថកិច្ចចាប់ឃាត់ខ្លួនចំនួន ៤លើកមកហើយ ដោយសារ តែការចូលរួមកិច្ចការងារសង្គម គឺលើកទីមួយ នៅខេត្តកោះកុង លើកទីពីរ នៅស្រុកស្អាង ខេត្តកណ្តាល លើកទីបី នៅខេត្តបាត់ដំបង និង លើកទីបួន នៅក្រុងប៉ោយប៉ែតនេះតែម្តង ។ ទោះបីលោកត្រូវទទួលរងការចាប់ខ្លួនជាញឹកញាប់ក៏ដោយចុះ ក៏លោក នៅតែប្តេជ្ញាបន្តសកម្មភាពការងាររបស់លោកបន្តទៅទៀត ដោយមិនមានការតក់ស្លុត ចំពោះការគំរាមកំហែងទាំងអស់នោះឡើយ ៕
អត្ថបទ និងរូបថត៖ ស៊ុំ ច័នុ្ទគា
