មន្ត្រីសិទ្ធិមនុស្ស សមាគមអាដហុក បានឲ្យដឹងថា ក្ដីកង្វល់ ចំពោះការប្រើប្រាស់ ប្រព័ន្ធតុលាការ ដើម្បីគំរាមកំហែង អ្នកការពារ សិទ្ធិមនុស្សកម្ពុជា ត្រូវបានលើក ឡើងនៅក្នុង ជំនួបមួយជា មួយក្រុមមន្ត្រី សហភាពអឺរ៉ុប នៅព្រឹកថ្ងៃទី០៤ ខែសីហា ឆ្នាំ២០១៥។
លោក នី ចរិយា ប្រធានផ្នែកសិទ្ធិមនុស្ស និងជំនួយផ្លូវច្បាប់នៃ សមាគមអាដហុក ដែលមានវត្តមាន នៅក្នុងជំនួបនោះ បានប្រាប់ដល់ ក្រុមអ្នកយកព័ត៌មានថា ក្រៅពីសកម្មភាព ការងារ របស់សមាគម ថ្នាក់ដឹកនាំស្ថាប័នសិទ្ធិមនុស្ស មួយនេះ បានបង្ហាញ ក្ដីកង្វល់ និងបញ្ហា ប្រឈមនានា ដែលអ្នកការពារ សិទ្ធិមនុស្ស កម្ពុជាជួបប្រទះក្នុងពេល បំពេញការងារ។
សកម្មជនការពារសិទ្ធិមនុស្សរូបនេះ បញ្ជាក់ថា អ្នកការពារសិទ្ធិកម្ពុជា តែងតែប្រឈមមុខនឹងការគំរាមកំហែងតាមរូបភាពផ្សេងៗ ជាពិសេស ការប្រើប្រាស់ប្រព័ន្ធតុលាការដើម្បីបំភិតបំភ័យអ្នកទាំងឡាយណាដែលហ៊ានចេញមុខតវ៉ាប្រឆាំងនឹងភាពអយុត្តិធម៌សង្គម។
លោក នី ចរិយា ក៏បានលើកយកករណីបណ្ដឹងប្រឆាំងរូបលោកនាពេលថ្មីៗនេះ ដែលធ្វើឡើងដោយលោក សុក កែវបណ្ឌិត អតីតព្រះរាជអាជ្ញារងសាលាដំបូងខេត្តសៀមរាប និង លោក គី ឫទ្ធី ចៅក្រមតុលាការខេត្តសៀមរាប។
សកម្មជនការពារសិទ្ធិមនុស្សរូបនេះ ត្រូវបានមន្ត្រីតុលាការប្ដឹងពីបទបរិហាកេរ្តិ៍ជាសាធារណៈ បរិហាបង្កាច់កេរ្តិ៍ និងធ្វើអត្ថាធិប្បាយដើម្បីដាក់សម្ពាធលើយុត្តាធិការ ក្រោយពីគាត់បានថ្លែងថា ពលរដ្ឋពីររូបដែលមានជម្លោះដីធ្លីនៅខេត្តសៀមរាប ត្រូវបានតុលាការឃុំខ្លួនខុសនីតិវិធី។
ពាក់ព័ន្ធនឹងការឃុំខ្លួនពលរដ្ឋទាំងពីររូបដោយខុសនីតិវិធីនេះ លោក នី ចរិយា បានដាក់បណ្ដឹងទៅស្ថាប័នធំៗប្រឆាំងនឹងមន្ត្រីតុលាការទាំងពីររូបនោះ ប៉ុន្តែ គ្មានចំណាត់ការណាមួយ ត្រូវបានគេធ្វើឡើងប្រឆាំងនឹងមន្ត្រីទាំងពីររូបនោះឡើយ។ ផ្ទុយទៅវិញ សកម្មជនការពារសិទ្ធិមនុស្សរូបនេះ ត្រូវបានសាលាដំបូងរាជធានីភ្នំពេញហៅចូលបំភ្លឺកាលពីថ្ងៃទី១៣ ខែកក្កដាកន្លងមក ទៅតាមបណ្ដឹងរបស់មន្ត្រីទាំងពីររូបនោះ។ ចប្ចុប្បន្ន សំណុំរឿងប្រឆាំងនឹងអ្នកការពារសិទ្ធិមនុស្សរូបនេះ កំពុងស្ថិតនៅក្នុងដៃចៅក្រមស៊ើបសួរនៃសាលាដំបូងរាជធានីភ្នំពេញ។
ក្រោយជំនួបនោះ ក្រុមមន្ត្រីសហភាពអឺរ៉ុប មិនបានធ្វើអត្ថាធិប្បាយអ្វីទៅកាន់ក្រុមអ្នកសារព័ត៌មានឡើយ។ ទោះជាយ៉ាងណា សេចក្ដីថ្លែងការណ៍មួយរបស់សង្គមស៊ីវិលអាស៊ីប៉ាស៊ីហ្វិច បានអំពាវនាវឲ្យរដ្ឋាភិបាលកម្ពុជាទម្លាក់ចោលជាបន្ទាន់ និងគ្មានលក្ខខណ្ឌនូវការចោទប្រកាន់ទាំងអស់ប្រឆាំងនឹងអ្នកការពារសិទ្ធិមនុស្សរូបនេះ៕
